Xəzandan qovrulmuş sanki çiçəkdi,
Toxunsam ləçəyi tökülməzmi de?
Köksümə sığınan bir kəpənəkdi,
Üfləsəm qanadı sökülməzmi de?
                       ◦◦◦
Könlü sıxıntılı,qəlbi göynəyən,
Acı taleyinə boyun əyməyən,
İllərdi telinə sığal dəyməyən,
Qərib sığalımdan bükülməzmi de?
                      ◦◦◦
Bir ofsunlu gözləri var yamanda,
Ürək oxşayandı könül duyandı.
Başımda sevdalı sisdi,dumandı,
Xəfif bir küləkdən çəkilməzmi de?
                     ◦◦◦
Bir gün ürəyini dələn sevgisi,
Sevincdən uçunub gülən sevgisi,
Bir nadan qəlbində ölən sevgisi,
Bu sınıq könlümə əkilməzmi de?
                     ◦◦◦
O, qərib o ürkək davranışıyla,
Könüldən könülə bağlanışıyla,
Gülən gözlərində ağlanışıyla
Özgə çiçəklərdən seçilməzmi de?
                     ◦◦◦
Vurub qapısını gedəsi olsam,
Səssizcə yanından ötəsi olsam,
Düşüb ürəyindən itəsi olsam
Gözləri yollara dikilməzmi de?
                     ◦◦◦
Xəzandan qovrulmuş sanki çiçəkdi,
Toxunsam ləçəyi tökülməzmi de?
Köksümə sığınan bir kəpənəkdi,
Üfləsəm qanadı söküməzmi de?