Gizlənpaç oynardıq səninlə bir vaxt,
Dad qatardın gəlişinlə oyuna.
Gizlənərdin hey mən səni tapardım,
Gizlənə - gizlənə alışdın buna.
                     ◦◦◦
İllər ağuşuna aldı bizləri,
Böyüdük zamanın qanadlarında.
Biz ilə sığındıq, inadın sənə,
Böyüdü səninlə inadların da.
                     ◦◦◦
Gizlənpaç oynama taleyinlə sən,
Onun acısından qopa bilməzsən.
Tale gizlənəndə yaman gizlənir,
Sonra itəsən də tapa bilməzsən.
                     ◦◦◦
İndi də gizlənpaç oynayırıq biz,
Yenə də göz yuman elə mənmişəm.
O qədər gizləndin mən səni tapdım,
İndisə sən axtar mən gizlənmişəm.