O gün heç özüm də bilmirdim nədən,
Gözüm ayrılmırdı sənin gözündən.
Nə doya bilirdim ay camalından,
Nə də göz yandıran o gül üzündən.
                        ◦◦◦
Elə bil o günü bir sehirkardın,
Huşumu başımdan alıb apardın.
Uçurub dünyamı başıma mənim,
Könül tellərimi çəkib qopardın.
                       ◦◦◦
Xumar baxışların laylalarında
Uçub xəyallara dalmışdım sanki.
Baş qoyub o məxmər sinənin üstə
Kiçicik bir körpə olmuşdum sanki.
                       ◦◦◦
Səhərə qovuşan bir gecə kimi
Uyuyan bir səsdim - səmirdim o gün,
Südə həsrət qalan bir körpə kimi,
Sənin baxışını əmirdim o gün.
                       ◦◦◦
Bir baxışla məni divanə etdin,
Gənclik həyatımı viranə etdin.
Heç nə anlamayan bu Mehmanı sən,
Sevgi alovuna pərvanə etdin.